Ansyen senatè Moïse Jean Charles pandan l t ap soti nan peyi Nijerya nan kad yon vizit te twouve l nan gwo difikilte ak imigrasyon nan peyi Etazini aprè yon eskal li t ap fè pou kapab rantre nan peyi l.
Senatè a ki te anbake nan yon avyon American Airlines fè konnen 2 ajan imigrasyon te debake nan ayewopò a epi pran l yo ale avè l. Si n kwè pawòl ansyen majistra Milo a, imigrasyon ameriken arete l depi yè lendi a bò 4 è epi ta pral mete l nan prizon vè minui edmi.
Pandan arestasyon an, Moïse Jean Charles fè konnen otorite imigrasyon yo t ap poze l kesyon sou koze rankont li ak Nicolas Maduro novanm pase a, Lidè Pitit Desalin lan fè konnen li pa t janm rankontre ak Nicolas Maduro mwa novanm ki sot pase a. Yo te ap kesyone l tou sou sa l te ale regle Nijerya, li fè konnen li te reponn yo konsa: “Si yo vle arete m, yo mèt arete m. M p ap janm di sa m ta pral fè an Afrik”.
Se lè sa yo ta pral mete politisyen an nan prizon bò minui edmi epi lage l bò 8 è maten an pou anbake l nan yon vòl komèsyal American Airlines. Pou Moïse Jean Charles, se paske li frape loksidan fò ki fè yo frape l konsa.
Lidè Pitit Desalin lan revele yo fè l ouvri bouch li epi mete de seri aparèy tout anndan bouch li. Konpòtman sa yo fè Moïse Jean Charles kwè loksidan enkyete epi fè konnen panik sa yo p ap fè l kanpe nan wout.
Ansyen kandida pou pòs prezidan an fè konnen imigrasyon koupe viza l epi avèti l pou l pa mete pye lakay yo pandan 5 ane. Aksyon sa yo, li kalifye yo de lachte.
