Depi kèk tan an Ayiti, itilizasyon entènèt vin prèske tounen yon nesesite pou moun k ap itilize sèvis konpayi telekominikasyon ki gen nan peyi a. Nan yon sondaj Cable.co.uk soti, yo montre pri mwayèn 1 GB entènèt nan rejyon Karayib la se nan peyi Dayiti li pi bon mache.
Toujou nan menm sondaj sa a, pami lòt peyi ki vini an tèt nan pri entènèt la pi abòdab nan rejyon an nou jwenn: Ayiti, Gwadloup, Repiblik Dominikèn ak Dominik pou n site sa yo sèlman.
Pou ale pi lwen, done sondaj gwoup la montre 1 GB entènèt koute an mwayèn $ 0.85 an Ayiti, pandan menm 1GB entènèt sa koute $ 1.51 nan Repiblik Dominikèn ki se peyi vwazen nou.
Pou yon moun itilize sèvis entènèt youn nan konpayi sa yo li oblije achte yon plan, nan chak konpayi plan yo diferan ak lòt, tout pa koute kliyan yo menm kòb. Gwoup la di nan pri itilizasyon 1 GB entènèt sa ki mwen chè a sou yon peryòd 30 jou an Ayiti se: $ 0.27, sa pi wo a se $ 1.90
N ap souliye rapò sa gwoup Cable.co.uk soti nou jwenn sou sit web www.altemajeanmarie.com pa pran an kont bon jan kalite sevis entènèt la pou chak peyi sa yo.
