Aprè li te fin fè aksidan nan wikenn lan, Jean Hérard Richard nou plis konnen sou non Mayestwo Richie fè yon videyo pou li remèsye tout moun ki te enkyete pou li yo epi fè yo konnen li anfòm. Yon lòt kote, akoz pèsekisyon gwoup Klass ak fanmiy li ap sibi, li pa ekate posibilite pou kite Mizik ayisyèn nan janvye 2023, si toutfwa anyen pa fèt.
Nan videyo sa ki dire 7 minit ki pibliye sou paj gwoup Klass la, atis ki soti Okap la raple pou piblik la li pa renmen reponn kesyon jis pou evite nan takotak ak moun, tout moun gen opinyon yo. Men daprè sa l di gen moun ki konn ap di bagay sou li paske yo pa konnen, jis paske yo tande l.
“ Mwen pa konn sa m fè lèzòm. Gen yon mouvman egri, gen yon jalouzi ki anraje la ”, se deklarasyon batè a, avan li ajoute “ li fè pati de vi a, men akoz se pèp ayisyen an ki bòs mwen, se yo ki pou pran responsabilite yo ”, se sa Mayestwo a ensiste pou l di, pandan li raple li pa nan zafè pran Avoka ni pote plent pou pèsonn.
Pi lwen, atis 52 lane a kontinye pou l presize li pa voye moun al fè vyolans sou pyès lòt moun. Pandan li rete kwè yo ka aji nan siyen petisyon. “ Yon senp petisyon, kote pou piti 100 mil moun ka siyen l. L ap jwenn atansyon sou Fesbouk, Enstagram…pou fè konnen moun sa yo pa serye, yo pa pwòp (clean), se difamasyon y ap fè. Y ap sal karaktè ak imaj moun paske yo jalou ”, pawòl ansyen chantè e mizisyen gwoup Zenglen an.
Pran mezi kont moun k ap atake l yo se wòl pèp la kote l ap travay pou li, se sa Mayestwo Richie deklare nan videyo sa ki sisite anpil reyaksyon sou rezo yo.
“ Mwen menm, se 2 bagay ki pi fò e ki pi solid nan lavi m. Se Klass avèk lakay mwen. Si yon moun rantre la, ou fè yon trè move wout ”, deklarasyon Jean Herard Richard. “ E si n kite l mache, paske m wè se tandans lan sa (moun ki medyòk, moun k ap joure, k ap fè bagay sa k ap mennen nan moman), konnen plas mw pa la. Lè m di plas mw pa la, m ap pale de Janvye 2023 pou m pa nan milye sa ankò paske si m paka fyè pou m di yon timoun vin la akoz mwen te jwenn yon Tabou, yon Septen…kite fè m vin la, si w renmen sa n ap fè a vini pou ranplase. Si m paka fè sa ak yon timoun ak tout kyetid pandan m konnen se pa nan tou m ap foure l. Mwen pa bezwen ladan l ”, konklizyon konpozitè a.
N ap souliye dènye jou sa yo anpil moun ki rele tèt yo enfliyansè oubyen blogè sou rezo sosyal yo pa sispann akize Mayestwo a kòm kwa jèn chantè Cadelouse ki vin rejwenn gwoup Klass la se ti anmourèz li.
