Pilòt yon avyon konpayi Delta Airlines ki t ap vole sòti Atlanta, Etazini, pou ale Baselòn, Espay, te twouve l nan obligasyon vandredi a pou kase tèt tounen akoz yon pasaje ki te gen dyare te sal anpil kote anndan aparèy la, daprè sa The Insider rapòte.
“ Se yon kesyon risk biyolojik. Gen yon pasaje ki gen dyare. Gen kaka tout kote nan avyon an. Fòk nou retounen Atlanta ”, se sa pilòt prensipal la te di kontwolè ayeryen yo pou l ka jwenn lòd retounen.
Avyon sila ki te dwe ale Baselòn te gen gen 2èdtan anlè lè pilòt la te oblije retounen, fè demitou. Te vin gen gwo tansyon anndan aparèy la, nan Kabin nan, paske lòt pasaje yo t ap pale anpil pou movèzodè epi pou kaka ki sal zafè yo.
Se yon evenman ensolit pou yon pilòt deside fè demitou pou kaka dyare k ap bay panik.
Aprè pwoblèm teknik, gaz, sante, meteyo ak pasaje k ap fè dezòd, gen lòt bagay pi biza ki konn fè yon vòl fèt anreta oubyen retounen, tankou si gen gwo odè marigwana k ap monte anndan aparèy la, lè gen plizyè twalèt ki pa fonksyone pandan vòl la, lè chaje zwazo nan espas ayeryen an, lè yon pasaje enpòtan bliye yon bagay, lè yon manman bliye pitit li, lè yon chyen anbake pa erè nan aparèy la.
