3èm jounen Festival Entènasyonal Literati Kreyòl la te dewoule nan lokal “Complexe Éducatif Franck Mésidor” nan komin Senmak, samdi 4 desanm 2021 an. Ane sa se ekriven Lionel Trouillot ki te envite donè evènman an ki te kòmanse premye desanm nan Pòtoprens pou te bout 5 desanm nan.
Twazyèm edisyon festival sa pou lane 2021 an fèt nan 2 komin ki se Pòtoprens ak Senmak. Se yon evènman ki òganize sòti premye pou rive 5 desanm men li te kòmanse nan nan Hôtel Marriott. Se ekriven Lionel Trouillot ki te envite donè. Lè sa otè “Kannjawou” a pran lapawòl pou l plede an favè lang kreyòl la pou amelyore kalite pwodiksyon yo nan lang la.
Festival la dewoule ane sa anba tèm ” Literati nan konstriksyon moun”. Nan senmak, anpil moun te fè deplasman an pou vin patisipe nan 3èm jounen sa nan yon bèl anbyans kote, kont, pwezi,chan, konferans, ekspozisyon zèv literè… pou n site sa yo sèlman ki te make 3èm jounen festival la nan lokal Complexe Éducatif Franck Mésidor.
Selon direktè enstitisyon an Frantz Eddy M.Mesidor se yon bèl opotinite pou pèmèt elèv yo devlope lespri kritik lakay yo. « Rive eveye lakay timoun yo yon lanmou pou liv, pou lekti, yon lanmou ekri, nou bezwen eveye lakay ti moun yo sans kritik e sans kritik sa ou p ap jwenn li lòt kote ke nan ekri, nan tande, nan liv » sa li fè nou konnen.
N ap raple, premye edisyon Festival Entènasyonal Literati Kreyòl la te retalize nan lane 2019, nan Pòtoprens ak kèk lòt vil nan pwovens. Lè sa, Manno Ejèn, Gertrude Séjour, Fondasyon Maurice Sixto, epi prezidan festival la Clautaire Saint-Natus Ki te envite donè.
