Nan yon atik jounal ameriken an New-York Times pibliye, li fè konnen gen anpil revelasyon Rodolphe Jaar fè sou dosye asasina Jovenel Moïse. Revelasyon sa yo kapab itil pou pèmèt ankèt la avanse lè nou konsidere gwosè deklarasyon sa yo.
Daprè New-York Times, Rodolphe Jaar avwe li te ede nan plan ki ta pral abouti ak asasinen prezidan Jovenel Moïse. Li te bay 130 mil dola vèt, li te ede jwenn zam, bay kay pou mèsenè kolonbyen yo rete.
Selon menm jounal la, Jaar te ede nan plan sa paske l te espere l ap jwenn avantaj komèsyal nan nouvo gouvènman ki t ap gen pou monte aprè a.
Rodolphe Jaar te kontinye pou l di ak jounal la Félix Badio te mande èd ak Premye Minis Ariel Henry pou l te ka lage pye l. Si n kwè jounal la, Ariel Henry te reponn li l ap pase kèk apèl pou ede l chape poul li.
Mesye Jaar fè konnen plan an se pa t touye Jovenel Moïse men pito arete l. Li fè konnen li pa konn kijan plan an fè chanje, se aprè y ap di l Jovenel Moïse mouri.
N ap raple 7 janvye ki sot pase a fè 6 mwa depi Jovenel Moïse mouri asasinen anndan lakay li aprè mèsenè kolonbyen melanje ak konplisite ayisyen te monte yon plan ki ta pral abouti ak dram sa. Pou kounya plizyè nan yo nan prizon, gen sispèk ki nan kache toujou. Genyen ki nan men lajistis lòt peyi.
