Meri Janrabèl la, nan yon nòt ki pote siyati Majistra Nathlie Petit Jean, ki parèt lendi 21 fevriye a mande reyabilitasyon 44 km wout Janrabèl-Pòdpè. Selon Meri a, genyen yon fon ki disponib pou wout sila a fèt depi sou ansyen prezidan Jovenel Moïse.
Wout Janrabèl-Pòdpè a vin enpratikab depi yon bout bout tan. Li pa bon ni nan moman solèy ni nan moman lapli.
Alòs gen yon fon di disponib pou twonson wout sa fèt depi sou ansyen lokatè Palè Nasyonal la si n kwè sa ki ekri nan nòt sila a.
“Nan kòmansman mwa avril 2021, moman gwo lapli ki te lakoz inondasyon nan Janrabèl, nou (Lameri) te gen chans resevwa Prezidan Jovenel Moïse ki te ankò vivan. Nou te diskite sou kesyon Wout la KI SE PI GWO PRIYORITE nou nan ba Nòdwès. Prezidan an te di nou genyen yon fon ki disponib nan FER (Fonds d’Entretien Routier) pou reyabilitasyon 44 km wout Pòdpè/Janrabèl la.Fon sa a te rete pou te al jwenn TPTC-Nòdwès”.
N ap raple 17 oktòb 2021 te fè komin nan 200 lane depi l fonde malerezman anpil janrabelyen pat ka patisipe nan fèt la akoz pa gen wout.
“Tankou nou te konstate 200 zan Komin nou an ki se Janrabèl pase anpil moun pat ka vini paske pa gen wout. Pa gen wout pou soti Pòdepè pou rive Janrabèl, pa gen wout pou soti Gonayiv lèw pase pa Answouj pou rive Janrabèl” , meri a k ap plenyen pandan l fè konnen se pa pwoblèm kòb ki lakoz wout la pa fèt.
Nan lide pou rezoud pwoblèm nan, pou wout la fèt pou pèmèt moun ale nan aktivite yo kòmsadwa meri a fè konnen “nan non tout popilasyon Janrabèl ak rès komin Ba Nòdwès yo ki paka sikile byen ni tan solèy ni nan lapli, m ap anonse Minis TPTC a kise Enjenyè Rosemond Pradel ak tout ( Direkté jenéral FER (Fonds D’entretien Routier ‘), minis finans lan M. Michel Patrick Boisvert epi Direktè Depatmantal TPTC/Nòdwès la ke finansman ki te la pou 44 Km wout Janrabèl la dwe vin reyabilite wout Janrabèl/Pòdepè .”
Nan yon ti batbouch redaksyon an te genyen ak Frantz E.Manchiny Mesidort ki se direktè Meri a sou telefòn, li fè konnen “Pèp Janrabèl la pa t oblije goumen ak Leta pou ba yo bon jan wout. Zafè wout se yon minimòm nan tout peyi k ap panse pwogrè ak devlopman. Moun pa viv konsa ankò depi epòk Mwayennaj. Mwen espere Leta nan pi wo Nivo yo va pou yon fwa fè yon bagay pou komin Janrabèl.”
Mesye Mésidort pwofite fè yon apèl ak tout sila ki rete kwè moun paka grandi nan sitiyasyon malouk sa a pou pote kole ak mouvman pitit Nòdwès espesyalman Janrabèl ap fè pou yo rive gen bon jan wout.
Wout sa ap bay pwoblèm lontan, kraze machin, moto akoz movèzeta li, se sak fè an 2013 MINUSTAH te amenaje l pou te pèmèt moun sikile byen, se yon te travay ki te kòmanse an novanm 2012. Men akoz pa gen mentnans wout la retounen nan yon eta ki pi mal.
