Ensekirite, pwoblèm elektrisite se pa sèl masife pèp Ayisyen an konnen. Pri twò wo, movè kalite, aksè difisil : dlo vin yon danre ra pou anpil moun nan peyi a sitou nan kèk zòn nan kapital la.
Nan kèk zòn nan komin Petyonvil tankou Jivena, Flipo, Mòn èkil, epi nan Sant Vil la, sitiyasyon an tanmen malouk kote moun yo oblije ap achte bokit dlo basen oswa dlo lapli pou 50 goud. Souvan, ti lòsyè dlo sa kontwole, gen yon kantite bokit y ap vann ou. Sou zile Lagonav, sitiyasyon sa ankò pi grav. Pandan tan sa, DINEPA pa kominike anyen.
Se gwo kouri ki genyen anpil kote lè dlo resi vini. Galon jòn ak bokit vin pi bon konpanyon anpil manm popilasyon an. Nan sans sa, abitan yo pa kache enkyetid yo fas ak pwoblèm sila. Direction Nationale de l’Eau Potable et de l’assainissement (DINEPA) pa fè gwo jefò pou pote pèsòn sekou.
” Nou pral gen 3 mwa depi yo pa janm bay tiyo epi mèt kay la ap mande pou nou peye kòb chak mwa pou dlo. Se dlo basen tou sal nou oblije ap achte pou 50 goud. Sak pi mal la dèfwa nou pa menm ka jwenn li menm “, Janine k ap plenyen.
Jack ki abite Mòn Èkil bezwen 100 goud pou l achte 3 bokit dlo kamyon. Nan yon nòt ki te soti nan mwa oktòb 2022, direktè jeneral DINEPA a, Guito Edouard, te bay popilasyon an plizyè rezon sou enkapasite pou yo ta bay tiyo nan zòn metwopolitèn lan. Batay ant de gwoup nèg ak zam nan zòn laplèn lan te youn ladan yo. 6 mwa aprè, DINEPA toujou pa pale sou pyès nouvote nan kesyon sa.
Pwoblèm dlo a pa sèlman touche depatman Lwès peyi a, plizyè zòn nan lòt depatman yo kòmanse ap fè fas ak gwo sechrès, sitou nan gran sid la. Nan Pestèl, yon komin nan depatman Grandans, sitiyasyon moun sa yo fin dejenere nèt depi aprè tranbleman tè 14 dawout 2021 an ki te kraze majorite pi ki nan zòn lan. Malgre tout apèl ki fèt, otorite nan Leta a pa janm di anyen jiskaske bèt kòmanse ap mouri e moun nan lokalite Makòmandan, oblije itilize pipi yo pou yo reponn ak kèk bezwen premye yo genyen, selon sa obsèvatè rapòte.
Ak prezans rivyè, n ap freyatik epi sezon lapli nan peyi an, pa ta sipoze gen mank dlo nan kèk rejyon men pi gwo pwoblèm lan se enstalasyon gang nan rejyon fètil yo. Malerezman, injerans ki gen nan zafè distribisyon dlo nan kapital la pa fè pati youn nan priyorite otorite yo.
©️ Nektarios Markogiannis – UN/MINUSTAH/ photo illustration
