Désilien SOUFFRANT se non granmoun 46 lane sa Lapolis arete samdi ki te 15 avril 2023 a paske li fè fo kidnapin sou pwòp tèt li, fèmen tèt li yon kote pou ka fè lajan. Selil kont anlèvman nan DCPJ lage akizasyon abi konfyans sou li aprè zak sa.
Selon yon nòt PNH pibliye sou paj Fesbouk li, arestasyon sitwayen sa vini aprè yon ankèt otorite polisyè yo te kòmanse aprè plent yo te resevwa sou anlèvman l nan dat ki te lendi 10 avril la.
Otorite yo ta pral dekouvri, se Désilien Souffrant ki te planifye kidnapin nan sou pwòp tèt li aprè patwon l te ba l kenbe yon bon valè lajan. Pou moman, sitwayen sa nan men DCPJ pou suit jidisyè yo.
Ayiti bay plis kè sote chak jou ki pase. Konfyans preske pa egziste ankò nan sosyete a. Tout moun pè youn lòt. Yon peyi ki malad nan tout kò l, men espesyalis poko ka manyen li.
