Nan kad yon konferans pou laprès Sektè Demokratik ak Popilè a (SDP) t ap òganize jodi lendi 10 Janvye 2022 a, nan lokal yo Delma 75, plizyè militan ki revòlte pete deblozay epi pètibe konferans sila.
Se sou anpil difikilte dirijan sektè a, André Michel te rive kite espas la. Militan sa yo ki kraze tab ak limye ki te nan espas la te an kolè kont politisyen sa yo. “ SDP sou pouvwa, kounya nou bezwen travay. Nou fin fè tout tan ap batay nou pa jwenn anyen. ”, se youn pami revandikasyon jèn gason sa yo.
Depi kèlke tan Dirijan sektè a pa sispann resevwa jouman nan men popilasyon ak militan ki endinye pou alyans yo ak Premye Minis Ariel Henry. Jodi a yo resi kite etap pawòl la pou fè aksyon. Jiska prezan poko gen reyaksyon kote lidè yo.
Konferans sa se te pou pale sou plizyè pwen tankou koze sekirite, manda 10 senatè yo, akò 11 septanm elatriye.
