Lendi 23 septanm nan, Gouvènman an deside lanse yon ansanm pwogram anba tèm: ijans miltisektoryèl pou apèzman ak reyensèsyon sosyal gwoup vilnerab yo. An total, se 22 pwojè plizyè Ministè pral jere egzekisyon yo, pami yo Ministè Afè Sosyal ak Travay (MAST).
Yon chif 9 391 000 000 goud ki se lajan ki disponib pou egzekisyon 22 pwojè sila yo kote Fon Asistans Ekonomik ak Sosyal (FAES) ap gen pou jere kowòdinasyon.
“Ministè Afè Sosyal sanse responsab mizannèv pwogram sa kote plizyè antite nan Leta enplike”, deklarasyon minis Georges Wilbert Franck.
Pwogram sila gen ladan 4 gwo aksyon prensipal, pami yo fè transfè lajan atravè NATCASH ak MON CASH bay moun ki pi vilnerab yo, tankou ouvriye soutretans, paran timoun lekòl, ti machann, moun nan katye ki pi pòv yo. Pwojè sa pral ede tou ak ranfòsman sekirite alimantè, tankou distribisyon 2 milyon pla cho. Pwojè a vize ede ti biznis yo rale yon souf pa rapò ak chòk kriz la fè sou yo. Nan katriyèm aks la, Leta vize pote soutyen l bay moun deplase yo a travè pwogram lan, se minis Afè Sosyal la, Georges Wilbert Franck te pousuiv pou di.
Se trezo piblik k ap finanse pwojè sa yo ak yon anvlòp 9 milya 391 milyon goud, ak sipò tou Fon Monetè Entènasyonal (FMI). Nan nivo Ministè Afè Sosyal, an kolaborasyon ak lòt Ministè yo, tout dispozisyon gentan pran sou plan finansye ak administratif pou reyalizasyon 22 pwojè ki nan pwogram la, se asirans sa responsab MAST la bay.
Se Ministè Afè Sosyal, Edikasyon, Afè Imanitè, Travo Piblik, Agrikilti, Komès, Fanm epi FAES ki ap mete men pou egzekisyon an.
