Blemur Accil, yon polisye, tire sou plizyè moun nan fanmiy li jodi lendi 18 avril la byen bonè nan maten,swa bò 3è. Nan ensidan sa, yon sè l rive pèdi lavi ansanm ak pitit fi l e mari l. Yon pitit gason sè a ki pran bal ap pran swen lopital e polisye a limenm pann tèt li aprè.
Dram sa pase nan Ri Batòl, nan vil Gonayiv. Redaksyon Passion Info Plus la te rive rantre an kontak ak yon moun nan vwazinaj fanmiy an nan objektif pou jwenn plis detay.
“ 3 moun mouri : yon sè li ak mari sè a epi pitit fi sè a. Epi gen yon lòt pitit gason sè a ki pran yon bal dèyè pye, li lopital ap pran swen. Blemur Accil fè 4 moun ki mouri a tou paske li pann tèt li bò 5è maten an ”, deklarasyon kontak nou.
Selon lòt enfòmasyon nou rive jwenn, polisye Blemur Accil gen kèk tan depi l te malad. Li t ap soufri ak yon maladi fetich « mistik ». Fòk nou di ak tout eta sante li pat kòrèk li te toujou al travay.
“ Wi li t ap viv nan kay la ansanm ak manmanl epi fanmiy lan. Blemur t ap dòmi epi manman l wè li leve li mande l kote l prale li di nan kay la li ye ”, detay sou ensidan an . “ Aprè manman an tande son katouch li panse se li ki touye tèt li. Lè manman parèt li kòmanse ap fè bri ak manman an li di l pa annafè ak li… Premye moun li tire se mari sè a e lè sè a kouri pou l mande èd li tire l tou. Pandan tan sa, manman li menm potko konn si moun yo mouri. Se lè li al rele bofis li a epi l jwenn li benyen ak san. ” yon rezime sou sak rive a sous nou fè pou nou.
N ap raple lè lapolis vini pou arete l, li tire sou polisye yo. Ta sanble polisye yo te nan yon machin ki blennde ki fè yo pa rive viktim. Jiska moman nou fè entèvyou ak sous nou an, pa gen moun ki wè madanm Blemur Accil ki t ap viv tou nan Kay la. Dènye fwa yo wè l, se dèyè mari a li t ap kouri.
Non sè ki mouri a se Wisline Accil, nyès lan se Rosederline Ceide e bofrè a se Ilfradieu Ceide.
