Premye minis Ariel Henry lanse jodi vandredi a 31 mas 2023 a yon platfòm ki pote non DELIDOC kote sitwayen yo ka fè demann anliy, sou entènèt, dokiman idantite yo tankou Paspò ak Kat Idantifikasyon Nasyonal.
Daprè sa Primati ekri sou Twitè, inisyativ sa gouvènman pran l nan objektif pou amelyore sèvis y ap bay popilasyon an.
“ Fas ak afliyans, gouvènman an te bay imigrasyon mwayen pou l ouvri plis biwo, men sa pat sifi. Se sa k fè nou akselere devlopman e-gouvènans lan e mobilize ekspè nasyonal nou genyen nan peyi a, pou kreye yon aplikasyon ki pra l fasilite tout sitwayen pran randevou anliy jan sa fèt lòt kote ”, mesaj Primati Repiblik la pibliye sou kont Twitè li.
“ Ak efò ministè Enteryè ak Imigrasyon fè pou modènize akèy ak kontribiyab yo, gouvènman an ap rantre tout bon nan I-gouvènans. Nou gen pou nou kontinye fè sa nan lòt administrasyon yo tou, pou nou ka bay pèp la pi bon sèvis “, sa gouvènman Ariel Henry anonse.
Fè paspò te toujou difisil nan peyi a, sak vin tounen yon kalvè depi lè administrasyon Biden lan anonse pwogram « Humanitarian Parole » la. Sitwayen yo peye jiska 150 000 goud pou pyès sa, ak tout sa akizisyon an pa yon bagay fasil. Anons lansman platfòm sa ki gen sit li https://www.delidoc.gouv.ht/ jwenn apresiyasyon anpil moun, li rete pou n swiv kòman sa pral mache.
